Համաշխարհային ՏՏ մրցանակ
Menu

Մեր մասին

ՏՏ ոլորտում համաշխարհային ներդրման համար Հայաստանի Հանրապետության պետական մրցանակ

2

009 թվականի հուլիսի 6-ին, Հայաստանի Հանրապետության Նախագահ Սերժ Սարգսյանը ստորագրեց տեղեկատվական տեխնոլոգիաների (ՏՏ) ոլորտում համաշխարհային ներդրման համար Հայաստանի Հանրապետության Նախագահի մրցանակի (Համաշխարհային ՏՏ մրցանակ) հիմնադրման վերաբերյալ հրամանագիրը:

Մրցանակը յուրաքանչյուր տարի շնորհվում է համաշխարհային ՏՏ ոլորտում բացառիկ ներդրումներ կատարած հեղինակավոր անհատի: Այս մրցանակաբաշխությամբ համաշխարհային ՏՏ քարտեզի վրա ընդգծվում է Հայաստանը՝ որպես բարձր տեխնոլոգիաների զարգացող կենտրոն:

Սկսած 2009 թվականից, մրցանակն ամեն տարի շնորհվում է մեկ անհատի , ում ներդրումները ՏՏ ոլորտում բերել կամ բերում են հեղափոխական կամ համանման բնույթ ունեցող զարգացումների, որոնք դրականորեն են անդրադարձել կամ ունեն ներուժ դրականորեն անդրադառնալու մարդկության վրա: Այդ ներդրումները կարող են ունենալ տարբեր դրսևորումներ՝ տեխնոլոգիական, կրթական, կազմակերպչական և ֆինանսական:

2018 թվականից այս մրցանակաբաշխությունը վերանվանվել է` ՏՏ ոլորտում համաշխարհային ներդրման համար ՀՀ պետական մրցանակի։

Մրցանակը բաղկացած է Հայաստանը և բարձր տեխնոլոգիաները խորհրդանշող ոսկե մեդալից, դիպլոմից և հուշախորհրդանիշից:
Հայաստանի Հանրապետության պետական մրցանակի դափնեկրի մեդալը իրենից ներկայացնում է ՀՀ նկարիչների միության նախագահ Կարեն Աղամյանի հեղինակած թևավոր առյուծը, որը վերամշակված է Էրեբունու որմնանկարների պատկերներից եւ խորհրդանշում է հայ ժողովրդի ուժը եւ իմաստությունը։ Առյուծը տեղադրված է Տեղեկատվական տեխնոլոգիաների սարդոստայնը բնորոշող գլոբուսի վրա։

Մրցանակը ամբողջությամբ պատրաստված է օպտիկական ապակուց։

Օպտիկական ապակու վրա տեղադրված են Հայաստանի ընդերքից հանված կիսաթանկարժեք քարերից պատրաստված զարդեր։

Մրցանակաբաշխության ծրագիրն իրականացվում է ՀՀ Վարչապետի կողմից նշանակված մրցանակաբաշխության կոմիտեի և միջազգային ընտրող հանձնաժողովի կողմից: